ഒരാള്‍ തനിച്ചാകുമ്പോള്‍ അയാള്‍ എന്താകുന്നുവോ അതായിരിക്കും ഒരു വ്യക്തിയുടെ സം‌സ്‌കാരം.ഇതാണ്‌ സംസ്‌കാരത്തെ കുറിച്ചുള്ള പൊതു നിര്‍‌വചനം.ഇതിലും ഒരു പണ തൂക്കം കൂടുതലാണത്രെ വിശ്വാസിയുടെ സംസ്‌കാരത്തെ കുറിച്ചുള്ള നിര്‍‌വചനം.ഒരാള്‍ രഹസ്യ സങ്കേതത്തിലാണെങ്കിലും പരസ്യ മൈതാനങ്ങളിലാണെങ്കിലും; നിരീക്ഷണ വിധേയനാണെന്ന ബോധത്തോടെയുള്ള അടക്ക അനക്കങ്ങളാണായിരിക്കും ഒരു വ്യക്തിയുടെ സംസ്‌കാരം.

Thursday, 11 May 2017

ഒരു തുറന്ന കത്ത്‌

പ്രിയരേ,അല്ലാഹു അനുഗ്രഹിക്കുമാറാകട്ടെ.വളരെ പ്രധാനപ്പെട്ട ഒരു കാര്യം എല്ലാവരേയും ഓര്‍‌മ്മിപ്പിക്കാനാണ്‌.ഈ കുറിപ്പ്‌.പരിശുദ്ധ റമദാന്‍ പടിവാതിലില്‍ എത്തിയിരിക്കുന്നു.

അനുഗ്രഹീതമായ മാസം.വിശ്വാസിയുടെ മനസ്സും,മസ്‌തിഷ്‌കവും എന്നല്ല അകവും പുറവും എല്ലാമെല്ലാം ശുദ്ധീകരിക്കാന്‍ - പുതുക്കിപ്പണിയാന്‍ അതിലുപരി ഈമാനിനെ പ്രോജ്ജലമാക്കാനുള്ള രാവും പകലും ഇതാ വരവായി.പ്രവാചക പാഠങ്ങള്‍ പരിശോധിച്ചാല്‍ റമദാനല്ലാത്ത മാസങ്ങളില്‍ ഏറ്റവും കൂടുതല്‍ വ്രത വിശുദ്ധിയ്‌ക്ക്‌ വേണ്ടി പ്രവാചക പ്രഭു നീക്കി വെച്ചത് ശ‌അബാനിലാണെന്നു കാണാം.അഥവാ ഏറെ അനുഗ്രഹീതമായ രാപകലുകളില്‍ ഇതാ എത്തിക്കഴിഞ്ഞിരിക്കുന്നു.വിശ്വാസികളുടെ ആത്യന്തികമായ മോഹം സങ്കല്‍‌പം ശാശ്വതമായ ജിവിതത്തിലെ സ്വര്‍‌ഗ പ്രവേശമാണ്‌.വിശ്വാസികള്‍‌ക്കിടയില്‍ പല കാര്യങ്ങളിലും വീക്ഷണ വ്യത്യാസം ഒരു പുതിയ കാര്യമൊന്നും അല്ല.ഇസ്‌ലാമിക ലോകം ഇതൊക്കെ അംഗീകരിക്കുന്നുമുണ്ട്‌.എന്തിനേറെ അഹ്‌ലുസ്സുന്നയ്‌ക്ക്‌ പൂര്‍‌ണ്ണമായും പുറത്ത്‌ നില്‍‌ക്കുന്ന ഷിയാക്കളെപ്പോലും ഉള്‍‌കൊള്ളാനാകും വിധം വിശാലമാണ്‌ ഇസ്‌ലാം.

എന്നെപ്പോലെയെന്തേ അപരന്‍ ചിന്തിക്കുന്നില്ല എന്നത്‌ അഭിലഷണീയമായ വിചാരമല്ലെന്നാണ്‌ ഈയുള്ളവന്റെ നിരീക്ഷണം.വൈജ്ഞാനികമായ റഫറുന്‍സുകള്‍ വിരല്‍ തുമ്പിലെന്നോണം ഓളം വെട്ടുന്ന ഇക്കാലത്ത്‌ വലിയ സം‌വാദങ്ങള്‍‌ക്കൊന്നും വലിയ പ്രസക്തിയില്ല.എന്റെ അറിവില്‍ നമ്മില്‍ പെട്ട എല്ലാവരും ഏതെങ്കിലും സം‌ഘത്തോടൊപ്പം ചരിക്കുന്നവരാണ്‌.തനിക്ക്‌ ശരി എന്നു മനസ്സിലാക്കിയത്‌ ആരായാലും സ്വീകരിക്കട്ടെ.ദയവു ചെയ്‌ത്‌ പരസ്‌പരം ഖബര്‍ മാന്തുന്ന വിതാനത്തിലേയ്‌ക്ക്‌ പോകരുത്.നാളെ പടച്ച തമ്പുരനോട്‌ പറയാന്‍ എന്തു ന്യായം എന്നതായിരിക്കണം നമ്മെ മദിക്കേണ്ടത്.

തര്‍ക്കമില്ലാത്ത എത്രയെത്ര വിഷയങ്ങള്‍ ഓര്‍‌ക്കാന്‍ മെനക്കെടാത്തവര്‍ പോലും അഭിപ്രായ വ്യത്യാസങ്ങളുള്ള കാര്യങ്ങളില്‍ ശ്വാസം മുട്ടുന്ന കാലമാണത്രെ വിശേഷിച്ച്‌ റമദാന്‍ വ്രത നാളുകളും അനുബന്ധ കാര്യങ്ങളും എന്നു ഈയിടെ വായിച്ചു പോയത്‌ സാന്ദര്‍ഭികമായി ഓര്‍‌ത്തു പോകുന്നു.

ഔചിത്യബോധമില്ലായ്‌മയില്‍ നിന്നും ഒപ്പം കക്ഷായം കുടിപ്പിക്കല്‍ രീതിയില്‍ നിന്നും സഹോദരങ്ങള്‍ വിട്ടു നില്‍‌ക്കണമെന്ന എളിയ അഭിപ്രായം ഇവിടെ രേഖപ്പെടുത്തുന്നു.

പ്രവാചക പാഠങ്ങള്‍ ഓതിപ്പറയാന്‍ അനാശാസ്യമായ ഭാഷയും ശൈലിയും ഉപയോഗിക്കുന്നത് ഇസ്‌ലാമിക സംസ്‌കാരമല്ലെന്നു പറയേണ്ടതില്ലല്ലോ?. അവതാരകരുടെ വിവരമില്ലായ്‌മയേയും സൂക്ഷ്‌മതക്കുറവിനെയുമാണ്‌ ഇതൊക്കെ സുചിപ്പിക്കുക എന്നും ഓര്‍‌മ്മപ്പെടുത്തുന്നു.

അല്ലാഹുവിന്റെ അനുഗ്രഹീതരായ ദാസന്മാരില്‍ ഉള്‍‌പെടുത്തി അനുഗ്രഹിക്കുമാറാകട്ടെ.വരുന്ന റമദാനിനെ പരിപൂര്‍‌ണ്ണാര്‍ഥത്തില്‍ ഉപയോഗപ്പെടുത്തി അല്ലാഹുവിന്റെ സം‌പ്രീതരായ ദാസന്മാരില്‍ ഉള്‍‌പെടാനുള്ള സൗഭാഗ്യം സിദ്ധിക്കുമാറാകട്ടെ.എന്ന വേദനയോടെയുള്ള പ്രാര്‍ഥനയോടെ.

അബ്‌ദുല്‍ അസീസ്‌ മഞ്ഞിയില്‍