Sangamam.

Aboo Kattil.

Winners.

Runners up Prize.

Election.

Audience.

Lin up.

ഒരാള്‍ തനിച്ചാകുമ്പോള്‍ അയാള്‍ എന്താകുന്നുവോ അതായിരിക്കും ഒരു വ്യക്തിയുടെ സം‌സ്‌കാരം.ഇതാണ്‌ സംസ്‌കാരത്തെ കുറിച്ചുള്ള പൊതു നിര്‍‌വചനം.ഇതിലും ഒരു പണ തൂക്കം കൂടുതലാണത്രെ വിശ്വാസിയുടെ സംസ്‌കാരത്തെ കുറിച്ചുള്ള നിര്‍‌വചനം.ഒരാള്‍ രഹസ്യ സങ്കേതത്തിലാണെങ്കിലും പരസ്യ മൈതാനങ്ങളിലാണെങ്കിലും; നിരീക്ഷണ വിധേയനാണെന്ന ബോധത്തോടെയുള്ള അടക്ക അനക്കങ്ങളാണായിരിക്കും ഒരു വ്യക്തിയുടെ സംസ്‌കാരം.

Thursday, 19 July 2018

ഹജ്ജ്‌ യാത്രയയപ്പ്‌

തിരുനെല്ലൂര്‍:കേവലമായ പുണ്യകരമായ നിര്‍ബന്ധ കര്‍‌മ്മങ്ങള്‍ എന്നതിലുപരി ഹൃദയം തൊട്ടറിഞ്ഞ പ്രാര്‍‌ഥനാനിരതമായ ദിനരാത്രങ്ങളിലൂടെ ലോക രക്ഷിതാവായ നാഥന്റെ സാമിപ്യം പ്രാപിക്കുന്ന ആത്മീയ യാത്രയാണ്‌ ഹജ്ജ്‌ കര്‍‌മ്മം.മാനവികതയും മാനുഷികതയും സൗഹൃദവും ഉയര്‍‌ത്തിപ്പിടിക്കുന്ന ശ്രേഷ്‌ടമായ സന്ദേശമാണ്‌ ചരിത്ര പ്രാധാന്യമുള്ള ഈ തീര്‍‌ഥയാത്രയിലുടനീളം പ്രകടിപ്പിക്കപ്പെടുന്നതും  പ്രസരിക്കപ്പെടുന്നതും.

ഈ മഹദ്‌ കര്‍‌മ്മ നിര്‍‌വഹണത്തിന്‌ സൗഭാഗ്യം ലഭിച്ച തിരുനെല്ലൂര്‍ മഹല്ലില്‍ നിന്നും യാത്ര തിരിക്കുന്ന എല്ലാ വ്യക്തിത്വങ്ങള്‍‌ക്കും വേണ്ടി ഒരു യാത്രയയപ്പും ഹജ്ജ്‌ പഠന ക്ലാസ്സും ഒരുക്കുന്നു.

തിരുനെല്ലൂര്‍ നൂറുല്‍ ഹിദായ മദ്രസ്സയില്‍ ജൂലായ്‌ 21 ന്‌ ശനിയാഴ്‌ച വൈകീട്ട്‌ 4 മണിക്ക്‌ സം‌ഘടിപ്പിക്കുന്ന പരിപാടിയില്‍ സാന്നിധ്യം കൊണ്ട്‌ ധന്യമാക്കണമെന്ന്‌ മഹല്ല്‌ വൃത്തങ്ങള്‍ അഭ്യര്‍‌ഥിച്ചു.

Tuesday, 17 July 2018

ഖബറടക്കം നാളെ

തിരുനെല്ലൂര്‍ : എസ്‌.വൈ.എസ് മുൻകാല സജീവ പ്രവർത്തകനും ഇപ്പോൾ വാർധക്യ സഹജമായി വിശ്രമത്തിലുമുള്ള കുഞ്ഞുമോൻ ഹാജി തിരുനെല്ലൂരിന്റെ മകനും ഖത്തറിലെ പ്രവർത്തകനായ ആർ.കെ.ഷിഹാബുദ്ധീൻറെ ജേഷ്ഠനും,തൃശ്ശൂർ ജില്ല ഖത്തർ കമ്മറ്റിയുടെ സജീവ സാനിധ്യമായ ആർ.കെ.ഹമീദ് ഹാജിയുടെ സഹോദരിയുടെ മകൻ,ഖത്തർ കേരള മുസ്‌ലിം ജമാഅത്ത് ജില്ലാ വൈസ്‌ പ്രസിഡന്റ് ഷാഹുൽ ഹമീദ് വെന്മേനാടിൻറെ മൂത്തുമ്മയുടെ മകനുമായ  ത്വാലിബ് അല്‍ ഐനില്‍ വെച്ച് ജൂലായ്‌ 13  ന്‌ വെള്ളിയാഴ്‌ച  മരണപ്പെട്ട വിവരം റിപ്പോര്‍‌ട്ട്‌ ചെയ്‌തിരുന്നു.

മരണമടഞ്ഞ ത്വാലിബിന്റെ മൃത ദേഹം നാളെ (ജൂലായ്‌ 18 ബുധനാഴ്‌ച) രാവിലെ 8 മണിക്ക് തിരുനെല്ലൂരിലുളള വീട്ടിൽ എത്തുകയും ഉടനെ തന്നെ ഖബറടക്കം നടക്കുകയും ചെയ്യുന്നതാണ്.പരേതന്‌ വേണ്ടി പ്രാര്‍‌ഥിക്കാനും മയ്യിത്ത് നിസ്ക്കാരം നടത്താനും ബന്ധുക്കള്‍ അഭ്യര്‍‌ഥിച്ചു.

Friday, 13 July 2018

ത്വാലിബ്‌ മരണപ്പെട്ടു

ദുബൈ:വടക്കന്റെകായില്‍ കുഞ്ഞുമോന്‍ ഹാജിയുടെ മകന്‍ ത്വാലിബ്‌ (50 വയസ്സ്‌) മരണപ്പെട്ടു.ഉച്ച ഭക്ഷണത്തിനു ശേഷം വിശ്രമിക്കാന്‍ കിടന്നതായിരുന്നു.ഉണര്‍‌ന്നു കാണാത്ത അവസ്ഥയില്‍ സുഹൃത്തുക്കള്‍ നോക്കുമ്പോള്‍ മരണപ്പെട്ടിരുന്നു.

ത്വാലിബ്‌ ദീർഘകാലം ദോഹയിലെ സൂഖ് ജാബിറിൽ ടോയ്‌സ് വേൾഡ് എന്ന സ്ഥാപനത്തിൽ ജീവനക്കാരനായിരുന്നു.മൂന്നു വര്‍‌ഷമായി യു.എ.ഇ അൽ ഐൻ അൽജിമി ഏരിയയിൽ ജോലിയില്‍ പ്രവേശിച്ചിട്ട്‌.

സഹോദര്‍ന്‍ ഷിഹാബ്‌ ഖത്തറില്‍ ഉണ്ട്‌.ഹാരിസ്‌ ഇപ്പോള്‍ നാട്ടിലാണ്‌.
ഭാര്യ:- വാഹിദ.മക്കള്‍:- ഹാദിയ ,തമീം ,മർവ എന്നിവർ വിദ്യാർത്ഥികളാണ്‌.മൃതദേഹം നടപടി ക്രമങ്ങൾ പൂർത്തിയാക്കി സ്വദേശത്തക്ക്‌ കൊണ്ടൂ പോകുവെന്ന് ബന്ധുക്കൾ അറിയിച്ചൂ.

മൃതദേഹം നാട്ടിലേയ്‌ക്ക്‌ കൊണ്ടുവരാനുള്ള ശ്രമങ്ങള്‍ അടുത്ത ദിവസം ജൂലായ്‌ 17 ന്‌ പൂര്‍‌ത്തിയാകുകയുള്ളൂ എന്നാണ്‌ യു.എ.ഇ യില്‍ നിന്നുള്ള വിവരം.ജൂലായ്‌ 18 ബുധനാഴ്‌ച ഖബറടക്കാന്‍ കഴിയുമെന്നാണ്‌ പ്രതീക്ഷിക്കുന്നത്.

ഉദയം പഠനവേദി,ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍,മുഹമ്മദന്‍സ്‌ ഖത്തര്‍ തുടങ്ങിയ പ്രവാസി സം‌ഘടനകള്‍ ത്വാലിബിന്റെ ആകസ്‌മിക നിര്യാണത്തില്‍ അനുശോചനം രേഖപ്പെടുത്തി.









13.07.2018
വെള്ളിയാഴ്ച

Sunday, 8 July 2018

സമൂഹത്തെ പുഷ്‌കലമാക്കാന്‍

സം‌സ്‌കൃതമായ ഒരു സമൂഹത്തെ പുഷ്‌കലമാക്കാന്‍ പ്രചോദിപ്പിക്കുന്ന അക്ഷരാര്‍‌ഥ കര്‍മ്മ സരണിയാണ്‌ ഹജ്ജ്‌ തീര്‍‌ഥാടനം.ഈ കര്‍‌മ്മത്തിലേയ്‌ക്കുള്ള ഒരുക്കം പോലും അത്യുല്‍‌കൃഷ്‌ടമാണ്‌.കരുണാ വാരിധിയായ തമ്പുരാന്റെ അനുഗ്രഹങ്ങളേറ്റുവാങ്ങാന്‍ ആ തിരുമുറ്റത്തേയ്‌ക്ക്‌ പ്രതീക്ഷാ നിര്‍‌ഭരമായ മനസ്സോടെയാണ്‌ യാത്ര ചെയ്യുന്നത്.കാരണം അല്ലാഹുവിന്റെ അനുഗ്രഹത്തെ കുറിച്ച്‌ നിരാശപ്പെടാതിരിക്കുക എന്നതത്രെ വിശ്വാസിക്ക്‌ നല്‍‌കപ്പെടുന്ന പാഠം.മണ്ണിലേയ്‌ക്ക്‌ ജനിച്ചു വീണ ഒരു കുഞ്ഞിന്റെ പവിത്രത പോലെയുള്ള അവസ്ഥയെ പുല്‍‌കാന്‍ വിശ്വാസിക്ക്‌ സാധ്യമാകുന്ന മഹിതമായ കര്‍‌മ്മം.അസീസ്‌ മഞ്ഞിയില്‍ പറഞ്ഞു.

ഇത്തവണ ഹജ്ജ്‌ കര്‍‌മ്മത്തിന്‌ പുറപ്പെടുന്ന തിരുനെല്ലൂര്‍ മഹല്ല്‌ പ്രസിഡണ്ട്‌ ബഹു അബു കാട്ടിലിന്‌ ദോഹയില്‍ ഒരുക്കിയ പ്രത്യേക യാത്രയയപ്പ്‌ യോഗത്തെ അഭിസം‌ബോധന ചെയ്യുകയായിരുന്നു മഞ്ഞിയില്‍.

കല്‍പിക്കപ്പെട്ട പഞ്ച കര്‍‌മ്മങ്ങള്‍‌ക്കും പ്രത്യേകം പ്രത്യേകം ലക്ഷ്യങ്ങളുണ്ട്‌.ഒരോ കര്‍‌മ്മവും വിശ്വാസിയിയ്‌ക്ക്‌ പകര്‍ന്നു നല്‍‌കുന്ന ഊര്‍‌ജ്ജകണങ്ങളാണ്‌ അവനെ വ്യതിരിക്തനാക്കിത്തീര്‍‌ക്കുന്നത്.അഥവാ ആചാരങ്ങള്‍‌ക്ക്‌ വേണ്ടിയുള്ള അനുഷ്‌ഠാനം അല്ല ഇസ്‌ലാമില്‍ പഠിപ്പിക്കപ്പെടുന്ന ആരാധനാനുഷ്‌ഠാനങ്ങള്‍. അല്ലാഹുവിന്റെ അനുഗ്രഹത്തില്‍ നിരാശയില്ലാത്തവന്റെ ജിവിതം സഫലമാണ്‌.പക്ഷെ സമൂഹത്തോടുള്ള ബാധ്യതകള്‍ അന്യൂനമായിരിക്കുക എന്ന ഉപാദി പാലിക്കപ്പെടേണ്ടതും അതിന്റെ അനിവാര്യതയത്രെ.പടപ്പുകളും പടപ്പുകളും തമ്മിലുള്ള വ്യവഹാരങ്ങളും ഇടപാടുകളും തൃപ്‌തിയും അതൃപ്‌തിയും പരസ്‌പരം പങ്കിട്ട അര്‍‌ഹമായതും അല്ലാത്തതും ഇതിലെ ന്യായവും അന്യായവും വ്യ്വസ്ഥാപിതമാക്കാനും പൂരിപ്പിക്കാനും വിശ്വാസി ബാധ്യസ്ഥനാണ്‌. ഇത്തരം ധാര്‍‌മ്മികമായ ഉത്തരവാദിത്തങ്ങളെ അവഗണിച്ചവര്‍‌ക്ക്‌ പരലോക മോക്ഷം സാധ്യമായിക്കൊള്ളണമെന്നില്ല. പ്രവാചക പ്രഭു പഠിപ്പിച്ച പരലോക വിചാരണയുടെ വാങ്മയ ചിത്രം അവതരിപ്പിച്ചു കൊണ്ട്‌ അസീസ്‌ വിശദീകരിച്ചു.

പടച്ചവനും പടപ്പുകളും തമ്മിലുള്ള കാര്യങ്ങളില്‍ പടച്ചവന്റെ അനുഗ്രഹം നിസ്‌തര്‍‌ക്കമത്രെ.എന്നാല്‍ പടപ്പുകളും പടപ്പുകളും തമ്മിലുള്ള കാര്യങ്ങളില്‍ അവകാശങ്ങളില്‍ അല്ലാഹു ഇടപെടുകയില്ല.പടപ്പുകളും പടപ്പുകളും തമ്മിലുള്ള സുദൃഢ്‌ ബന്ധത്തിലൂടെയാണ്‌ പടച്ചവനിലേയ്‌ക്ക്‌ അടുക്കാന്‍ വിശ്വാസിക്ക്‌ കഴിയുന്നത്. താന്‍ സമുഹ മധ്യേ സാക്ഷ്യപ്പെടുത്തിക്കൊണ്ടിരിക്കുന്ന സാക്ഷാല്‍ പ്രതിനിധാനമായിരിയ്‌ക്കും വിശ്വാസിയുടെ കര്‍‌മ്മ പദത്തിലെ വിജയത്തിന്റെ മാനദണ്ഢം.

തുടര്‍ന്ന്‌ നടന്ന ചര്‍ച്ചയില്‍ ആനുകാലിക സം‌ഭവ വികാസങ്ങളും ഗ്രാമന്തരീക്ഷത്തെ വിഷലിപ്‌തമാക്കും വിധമുള്ള ഓണ്‍ ലൈന്‍ ഓഫ്‌ ലൈന്‍ സംവാദങ്ങളും സോഷ്യല്‍ മീഡിയാ ദുരുപയോഗവും,അതിന്റെ ചതിക്കുഴികളും നിരീക്ഷിക്കപ്പെട്ടു.ഒരു സമൂഹത്തിന്റെ ആരോഗ്യകരമായ അവസ്ഥയെ പരിപാലിക്കനുള്ള പ്രാഥമികമായ ധാര്‍മ്മിക പാഠങ്ങള്‍ പോലും ഒരു വേള സഹോദരങ്ങളും സഹവാസികളും മറന്നു പോകുന്ന അവസ്ഥ ദൗര്‍‌ഭാഗ്യകരമാണെന്നും വിലയിരുത്തപ്പെട്ടു.അനുവദനീയമായ വേദിയില്‍ നിശബ്‌ദത പാലിക്കുകയും അനുഗുണമല്ലാത്ത ഇടങ്ങളില്‍ പുകപ്പിക്കുകയും എന്ന സംസ്‌കാരം കെട്ട നടപടികള്‍ നിരുത്സാഹപ്പെടുത്തുകയും നിര്‍‌മാര്‍‌ജ്ജനം ചെയ്യുകയും വേണം.സദസ്സ്‌ അടിവരയിട്ടു.

തുടര്‍‌ന്ന്‌ ബഹു തിരുനെല്ലൂര്‍ മഹല്ല്‌ പ്രസിഡണ്ട്‌ മറുപടി പ്രസംഗം നടത്തി.മഹല്ലിന്റെ നേതൃത്വം എന്ന നിലയിലുള്ള ഉത്തരവദിത്തം യഥാവിധി നിര്‍വഹിച്ചു പോരുന്നുണ്ട്‌ എന്നാണ്‌ വിശ്വാസം.ഒരു പ്രദേശത്തെ നന്മേഛുക്കളോടൊപ്പം സഹകരിച്ചും സഹവസിച്ചും സമൂഹത്തിന്റെ ഉയര്‍‌ച്ചക്കും അഭിവൃദ്ധിയ്‌ക്കും സാധ്യമാകും വിധം സേവനം എന്നതില്‍ ശ്രദ്ധ കേന്ദ്രീകരിച്ചിരിക്കുകയാണ്‌.പ്രവാസ ലോകത്ത് ക്ഷേമ പ്രവര്‍‌ത്തനങ്ങള്‍‌ക്ക്‌ തന്നാലാവും വിധം ചെയ്യാന്‍ സഹായിച്ചവരും സഹകരിച്ചവരും തന്നെയാണ്‌ ഇന്നും നന്മയുടെ മാര്‍‌ഗത്തില്‍ കൂടുതല്‍ പ്രചോദനം ചെയ്യുന്നവര്‍.ഒരുവേള അവര്‍ തന്നെയാണ്‌ ഈ സേവന പാതയുടെ നേതൃത്വത്തിലെത്തിപ്പെടാനുള്ള സാഹചര്യം ഒരുക്കിയതും. അബു കാട്ടില്‍ സൂചിപ്പിച്ചു.

ആത്മീയമായി ഊര്‍‌ജ്ജം നല്‍‌കപ്പെട്ട ആമുഖ ഭാഷണം അനുഗ്രഹീതമാണ്‌.ഈ അവസരത്തിന്റെ സകല നന്മകളും ഉള്‍‌കൊള്ളാന്‍ നാമെല്ലാവരും ബാധ്യസ്ഥരാണ്‌.ആര്‍‌ക്കും അരോചകമാകാത്ത വിധം എന്നതിലുപരി ഏവര്‍‌ക്കും സ്വാഗതാര്‍ഹമായ ശൈലിയില്‍ ജീവിതത്തെ ക്രമപെടുത്താനുള്ള മാനസികമായ തയ്യാറെടുപ്പിനെ ബലപ്പെടുത്താനും അത് പ്രിയപ്പെട്ടവരോട്‌ പ്രഖ്യാപിക്കാനും ഈ അവസരത്തെ ബോധ പൂര്‍‌വ്വം ഉപയോഗപ്പെടുത്തുന്നു.അദ്ദേഹം ഉറച്ച സ്വരത്തില്‍ പറഞ്ഞു. 

ഇപ്പോള്‍ നാട്ടിലാണെങ്കിലും ഇടപഴക്കങ്ങളും ഇടപെടലുകളും അധികവും പ്രവാസികളുമായിത്തന്നെയായിരിക്കണം.അതിനാല്‍ പ്രിയപ്പെട്ട എല്ലാ പ്രദേശവാസികളോടുമുള്ള യാത്ര ചോദിക്കാനും സൗഹൃദം പുതുക്കാനും പരസ്‌പരമുള്ള പ്രാര്‍‌ഥനകള്‍‌ക്ക്‌ അഭ്യര്‍‌ഥിക്കാനും ഈ അവസരത്തെ വിനിയോഗിക്കുന്നു.ഈ വൃത്തം വഴി ഈ സന്ദേശം സഹോദരങ്ങളിലെത്തുമെന്ന പ്രതീക്ഷയിലാണ്‌ ഇത്‌ പറയുന്നത് എന്ന അടിവരയോടെ അദ്ദേഹം അഭ്യര്‍‌ഥിച്ചു.

ഖത്തര്‍ മഹല്ല്‌ അസോസിയേഷന്‍ തിരുനെല്ലുര്‍ പ്രസിഡണ്ട്‌ ഷറഫു ഹമീദിന്റെ അഭാവത്തില്‍ വൈസ്‌ പ്രസിഡണ്ട്‌ റഷീദ്‌ കെ.ജി അധ്യക്ഷത വഹിച്ചു.സീനിയര്‍ അം‌ഗങ്ങളായ ഹമീദ്‌ ആര്‍.കെ,ഖമറു കടയില്‍,ഫൈസല്‍ അബൂബക്കര്‍,റഷാദ്‌ കെ.ജി, സെക്രട്ടറി ഷൈതാജ്‌ മൂക്കലെ,സെക്രട്ടറി ഹാരിസ്‌ അബ്ബാസ് എന്നിവര്‍ ചര്‍‌ച്ചയെ സമ്പന്നമാക്കി.

ജൂലായ്‌ 7 ന്‌ ഗ്രാന്‍‌ഡ്‌ ഖത്തര്‍ പാലസ്‌ ഹോട്ടലില്‍ സം‌ഘടിപ്പിച്ച പരിപാടി വൈകീട്ട്‌ 8.45 ന്‌ തുടങ്ങി 9.45 ന്‌ സമാപിച്ചു.ശേഷം എല്ലാവരും ഒരുമിച്ചിരുന്ന്‌ അത്താഴം കഴിച്ചാണ്‌ പിരിഞ്ഞത്.


Saturday, 30 June 2018

പൂത്തോക്കില്‍ ഖാദര്‍ സാഹിബ്‌ നിര്യാതനായി

തിരുനെല്ലൂര്‍:പൂത്തോക്കില്‍ ഖാദര്‍ സാഹിബ്‌ നിര്യാതനായി.തിരുനെല്ലുര്‍ മഹല്ല്‌  പ്രസിഡന്റായി സേവനമനുഷ്‌ഠിച്ചിട്ടുണ്ട്‌.വാര്‍ദ്ധക്യ സഹജമായ രോഗങ്ങളാലും പ്രയാസങ്ങളാലും ചികിത്സയിലും പരിചരണത്തിലുമായിരുന്നു.

രണ്ട്‌ വര്‍‌ഷത്തോളമായി പെരുവല്ലൂരിലാണ്‌ താമസം.ഭാര്യയും സാഫിര്‍,സാഹിര്‍ എന്നീ രണ്ട്‌ ആണ്‍‌മക്കളും  മൂന്നു പെണ്‍‌മക്കളും ഉണ്ട്‌.ഖബറടക്കം തിരുനെല്ലൂര്‍ മഹല്ല്‌ ഖബര്‍‌സ്ഥാനില്‍ ഇന്ന്‌ മധ്യാഹ്നത്തോടെ നടക്കുമെന്ന്‌ ബന്ധുക്കല്‍ അറിയിച്ചു.

ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍,മുഹമ്മദന്‍‌സ്‌ ഖത്തര്‍,ഉദയം പഠനവേദി ഇതര പ്രവാസി കൂട്ടായ്‌മകളും അനുശോചനം രേഖപ്പെടുത്തി.ഖബറടക്കത്തിനു ശേഷം നൂറുല്‍ ഹിദായ മദ്രസ്സയില്‍ വെച്ച്‌ അനുസ്‌മരണ സം‌ഗമവും പ്രാര്‍‌ഥനയും ഉണ്ടാകുമെന്ന്‌ മഹല്ല്‌ വൃത്തങ്ങള്‍ അറിയിച്ചു.

Wednesday, 27 June 2018

ദിക്‌റ്‌ ഹല്‍‌ഖാ വാര്‍‌ഷികം

തിരുനെല്ലൂര്‍:1965 ലായിരുന്നു തിരുനെല്ലൂര്‍ മഹല്ലു ജുമാമാസ്‌ജിദില്‍ ദിക്‌റ്‌ ഹല്‍‌ഖ പ്രാരം‌ഭം കുറിച്ചത്. അതിനു ശേഷം തിരുനെല്ലൂര്‍ ജുമാ മസ്‌ജിദില്‍ ആഴ്‌ച തോറും നടന്നു വരുന്ന ദിക്‌റ്‌ ഹല്‍‌ഖയുടെ അമ്പത്തിമൂന്നാം വാര്‍ഷികം ജൂലായ്‌ 13 വെള്ളിയാഴ്‌ച വൈകീട്ട്‌ എട്ടിന്‌ പ്രാര്‍‌ഥനാ നിര്‍‌ഭരമായ സദസ്സിനെ സാക്ഷിയാക്കി സംഘടിപ്പിക്കുമെന്ന്‌ സ്വാഗത സം‌ഘം ചെയര്‍‌മാന്‍ അബ്‌ദുല്‍ കബീര്‍ ആര്‍.വി,കണ്‍‌വീനര്‍ കാദര്‍‌മോന്‍ വി.എം എന്നിവര്‍ അറിയിച്ചു.

ആദരണീയനായ സയ്യിദ്‌ ഫസല്‍ തങ്ങള്‍ ഐദറൂസി വാടാനപ്പള്ളി ദുആ നേതൃത്വം നല്‍‌കും.മഹല്ലു ഖത്വീബ്‌ ബഹു: അബ്‌ദുല്ല അഷ്‌റഫി, മഹല്ലു പ്രസിഡണ്ട്‌ അബു കാട്ടില്‍, മദ്രസ്സ സദര്‍,മദ്രസ്സാ അധ്യാപകര്‍,പ്രദേശത്തെ ഖത്വീബ്‌മാരും പണ്ഡിതന്മാരും മഹല്ല്‌ നേതൃത്വങ്ങളും ദാക്കിരീങ്ങളും സദസ്സിനെ ധന്യമാക്കും.ജൂലായ്‌ 14 ന്‌ കാലത്ത്‌ 6 മണിമുതല്‍ 11 വരെ അന്നദാനവും നടക്കും.ദിക്‌ര്‍ ഹല്‍‌ഖാ വാര്‍‌ഷിക സ്വാഗത സംഘം അറിയിച്ചു. 

Monday, 25 June 2018

സം‌ഗമം സാഘോഷം പര്യവസാനിച്ചു

തിരുനെല്ലൂര്‍:മലയാളിയുടെ സാംസ്കാരിക പരിസരം ഇത്രയേറെ മലീമസമായ ഒരു കാലം ഉണ്ടായിട്ടില്ലെന്നും സാംസ്കാരികമായ ഈ അപചയത്തെ മറികടക്കാനായില്ലെങ്കിൽ നാം വലിയ വില നൽകേണ്ടി വരുമെന്നും സാഹിത്യ നിരൂപകൻ ബാലചന്ദ്രൻ വടക്കേടത്ത് അഭിപ്രായപ്പെട്ടു. നന്മ സാംസ്കാരിക സംഗമം ഉദ്ഘാടനം ചെയ്‌ത്‌ സംസാരിക്കുകയായിരുന്നു വടക്കേടത്ത്.അതു കൊണ്ട്‌ തന്നെ ഇത്തരം സാം‌സ്‌കാരിക സം‌ഗമങ്ങള്‍ നന്മ കാം‌ക്ഷിക്കുന്നവരുടെ ആശയും ആശ്വാസവുമാണെന്ന്‌ അദ്ധേഹം പറഞ്ഞു.

ഗ്രാമത്തിലെ വിദ്യാഭ്യാസ രംഗത്ത് മികവ് പുലർത്തിയ പ്രതിഭകള്‍‌ക്കുള്ള പ്രോത്സാഹന പുരസ്‌കാരങ്ങളും ഇതര സാമൂഹ്യ സാം‌സ്‌കാരിക പരിപാടികളും സായാഹ്നത്തെ സമ്പന്നമാക്കി.ശ്രീ.രാധാകൃഷ്‌ണന്‍ കാക്കശ്ശേരി മുഖ്യ പ്രഭാഷണം നിര്‍‌വഹിച്ചു,ഗുരുവായൂര്‍ അസിസ്റ്റന്റ് പൊലീസ്‌ കമ്മീഷ്‌ണര്‍ ശ്രീ.പി.എ ശിവദാസന്‍ മുഖ്യാതിഥിയായിരുന്നു.

അബു കാട്ടില്‍ (തിരുനെല്ലൂര്‍ എ.എം.എല്‍.പി സ്‌കൂള്‍ മാനേജര്‍),അനില്‍ ടി.മേപ്പള്ളി(പാവറട്ടി എസ്‌.ഐ), ജാഫര്‍ സാദിഖലി തങ്ങള്‍ തുടങ്ങിയവര്‍ പുരസ്‌കാര സമര്‍‌പ്പണം നടത്തി.എ.കെ. ഹുസ്സൈന്‍ (പഞ്ചായത്ത്‌ പ്രസിഡണ്ട്‌) ഹാജി ഹുസ്സൈന്‍ കെ.വി (നന്മ രക്ഷാധികാരി) ഇസ്‌മാഈല്‍ ബാവ (നന്മ ചെയര്‍‌മാന്‍),അബ്‌ദുല്‍ ജലീല്‍ വി.എസ്‌ (നന്മ വൈസ്‌ ചെയര്‍‌മാന്‍)പി.എം ഷം‌സുദ്ധീന്‍ (നന്മ കണ്‍‌വീനര്‍) തുടങ്ങിയവര്‍ പഠനോപകരണങ്ങള്‍ വിതരണം ചെയ്‌തു.ഉമര്‍ കാട്ടില്‍ (പ്രസിഡണ്ട്‌ മാറ്റ്‌ അബുദാബി),ആനി പോള്‍ (എച്ച്‌.എം.എ.എം.എല്‍.പി.സ്‌കൂള്‍) സൈനുദ്ധീന്‍ ഖുറൈഷി,മനോഹര്‍ തിരുനെല്ലൂര്‍,റഷീദ്‌ മതിലകത്ത്‌,പി.ബി ഉസ്‌മാന്‍,ആര്‍.വി കബീര്‍,ഹാരിസ്‌ ആര്‍.കെ തുടങ്ങിയവര്‍ ആശം‌സകള്‍ നേര്‍‌ന്നു.

ഗ്രാമത്തിലെ കരുത്തരായ എഴുത്തുകാരില്‍ മുന്‍‌നിരയില്‍ നില്‍‌ക്കുന്ന റഹ്‌മാൻ തിരുനെല്ലൂരിൻറെ പരിധിക്കു പുറത്തുള്ള ചില കാര്യങ്ങൾ എന്ന പുസ്തകം ചടങ്ങില്‍ പ്രകാശനം ചെയ്യപ്പെട്ടു,


ചിര പുരാതന മഹല്ല്‌ പള്ളിയുടെ ആദ്യത്തെ പുനരുദ്ധരണത്തിന്‌ നേതൃത്വം കൊടുത്തവരില്‍ മുന്‍ നിരയിലുണ്ടായിരുന്ന മോനുക്ക,തിരുനെല്ലൂര്‍ മഹല്ല്‌ സെക്രട്ടറി - പ്രസിഡന്റ്‌ എന്നീ പദവികള്‍ മാതൃകാപരമായി നിര്‍വഹിച്ച .ഗ്രാമത്തിലെ മാതൃകാ കര്‍‌ഷകര്‍ക്കുള്ള കര്‍‌ഷക ശ്രീ അവാര്‍‌ഡിനും അര്‍‌ഹനായ അബൂബക്കര്‍ മാഷ്‌,ഇസ്ലാമിക വൈജ്ഞാനിക രംഗത്ത് ബിരുദം കരസ്ഥമാക്കിയ മുഹമ്മദ് മുനീറിനും മികച്ച നേട്ടം കൊയ്‌ത വിദ്യാർത്ഥികൾക്കുമുള്ള തിരുനെല്ലൂര്‍ എന്ന മനോഹരമായ ഗ്രാമത്തിന്റെ അംഗീകാരം,എ.എം.എൽ.പി.സ്കൂളിലെ മഴുവൻ വിദ്യാർത്ഥികൾക്കുമുള്ള പഠനോപകര വിതരണം എന്നിവയായിരുന്നു പ്രധാന അജണ്ട.

നന്മ തിരുനെല്ലൂര്‍ ജനറല്‍ കണ്‍‌വീനര്‍ ഷിഹാബ്‌ എം.ഐ യുടെ സ്വാഗത ഭാഷണത്തോടെ ആരം‌ഭിച്ച സം‌ഗമം സഹൃദയരുടെ നിറഞ്ഞ സാന്നിധ്യം കൊണ്ട്‌ ശ്രദ്ധേയമായി.








Thursday, 21 June 2018

സാംസ്കാരിക സം‌ഗമം

തിരുനെല്ലൂർ: നന്മ തിരുനെല്ലൂർ സാംസ്കാരിക സം‌ഗമം സം‌ഘടിപ്പിക്കുന്നു. ഗ്രാമത്തിലെ വിദ്യാഭ്യാസ രംഗത്ത് മികവ് പുലർത്തിയ പ്രതിഭകള്‍‌ക്കുള്ള പ്രോത്സാഹന പുരസ്‌കാരങ്ങളും ഇതര സാമൂഹ്യ സാം‌സ്‌കാരിക പരിപാടികളും സായാഹ്നത്തെ സമ്പന്നമാക്കും.

ശ്രീ. ബാലചന്ദ്രന്‍ വടക്കേടത്ത് സം‌ഗമം ഉദ്‌ഘാടനം ചെയ്യും, ശ്രീ.രാധാകൃഷ്‌ണന്‍ കാക്കശ്ശേരി മുഖ്യ പ്രഭാഷണം നിര്‍‌വഹിക്കും,ഗുരുവായൂര്‍ അസിസ്റ്റന്റ് പൊലീസ്‌ കമ്മീഷ്‌ണര്‍ ശ്രീ.പി.എ ശിവദാസന്‍ മുഖ്യാതിഥിയായിരിയ്‌ക്കും.തിരുനെല്ലൂര്‍ മഹല്ല്‌ പ്രസിഡന്റും സ്‌കൂള്‍ മാനേജറുമായ അബു കാട്ടില്‍ വേദിയെ ധന്യമാക്കും.

അബു കാട്ടില്‍(എ.എം.എല്‍.പി സ്‌കൂള്‍ മാനേജര്‍),അനില്‍ ടി.മേപ്പള്ളി(പാവറട്ടി എസ്‌ഐ),ജാഫര്‍ സാദിഖലി തങ്ങള്‍ തുടങ്ങിയവര്‍ പുരസ്‌കാര സമര്‍‌പ്പണം നടത്തും.ഹാജി ഹുസ്സൈന്‍ കെ.വി (നന്മ രക്ഷാധികാരി)അബ്‌ദുല്‍ ജലീല്‍ വി.എസ്‌ (നന്മ വൈസ്‌ ചെയര്‍‌മാന്‍)പി.എം ഷം‌സുദ്ധീന്‍ (നന്മ കണ്‍‌വീനര്‍) തുടങ്ങിയവര്‍ പഠനോപകരണങ്ങള്‍ വിതരണം ചെയ്യും.എം.ബി സെയ്‌തു മുഹമ്മദ്‌,ഉമര്‍ കാട്ടില്‍ (പ്രസിഡണ്ട്‌ മാറ്റ്‌ അബുദാബി),ആനി പോള്‍ (എച്ച്‌.എം എ.എം.എല്‍.പി സ്‌കൂള്‍)സൈനുദ്ധീന്‍ ഖുറൈഷി,മനോഹര്‍ തിരുനെല്ലൂര്‍,റഷീദ്‌ മതിലകത്ത്‌,പി.ബി ഉസ്‌മാന്‍,ആര്‍.വി കബീര്‍,എ.അഹമ്മദ്‌,നൗഷാദ്‌ അഹമ്മദ്‌,ഹാരിസ്‌ ആര്‍.കെ തുടങ്ങിയവര്‍ ആശം‌സകള്‍ നേര്‍‌ന്നു സം‌സാരിക്കും.

റഹ്‌മാൻ തിരുനെല്ലൂരിൻറെ പരിധിക്കു പുറത്തുള്ള ചില കാര്യങ്ങൾ എന്ന പുസ്തകത്തിന്റെ പ്രകാശനം,ഇസ്ലാമിക വൈജ്ഞാനിക രംഗത്ത് ബിരുദം കരസ്ഥമാക്കിയ മുഹമ്മദ് മുനീറിനും മികച്ച നേട്ടം കൊയ്‌ത വിദ്യാർത്ഥികൾക്കുമുള്ള ഗ്രാമത്തിന്റെ അംഗീകാരം,നാട്ടിലെ കാരണവന്മാരായ എം.വി അഹമ്മദ് ,ഗ്രാമത്തിലെ പ്രഥമ അധ്യാപകനായ എം.കെ.അബൂബക്കർ മാസ്റ്റർ എന്നിവര്‍ക്കുള്ള ആദര സമര്‍‌പ്പണം,എ.എം.എൽ.പി.സ്കൂളിലെ മഴുവൻ വിദ്യാർത്ഥികൾക്കുമുള്ള പഠനോപകര വിതരണം എന്നിവയായിരിയ്‌ക്കും പ്രധാന അജണ്ട.

ജൂൺ 24 ഞായറാഴ്ച വൈകീട്ട് 4 മണിക്ക് എ.എം.എല്‍‌.പി സ്‌കൂളില്‍ ഒരുക്കുന്ന പരിപാടിയിലേക്ക് എല്ലാ സഹൃദയരേയും സ്വാഗതം ചെയ്യുന്നതായി നന്മ തിരുനെല്ലൂര്‍ വൃത്തങ്ങള്‍ അറിയിച്ചു.

Friday, 15 June 2018

ഇഫ്‌ത്വാര്‍ സം‌ഗമം ധന്യമായി

തിരുനെല്ലൂര്‍:വിജയ പാതയില്‍ ക്ഷമാ പൂര്‍‌വ്വം സഞ്ചരിക്കുക.പരിശുദ്ധമാസത്തിലെ പരിശീലനങ്ങള്‍ വഴി നേടിയെടുത്ത പരോപകാര ശീലവും സഹനവും സല്‍‌കര്‍മ്മങ്ങളും വരും നാളുകളിലെ ജീവിതത്തിലും ഉപകരിക്കണം.

തിരുനെല്ലൂരിന്റെ ചരിത്രത്തില്‍ പുതിയ ഒരധ്യായം തുന്നിച്ചേര്‍‌ത്ത ഖത്തര്‍ മഹല്ല്‌ അസോസിയേഷന്‍ തിരുനെല്ലുര്‍ ഇഫ്‌ത്വാര്‍ സം‌ഗമം ജന പങ്കാളിത്തം കൊണ്ട്‌ ഏറെ ശ്രദ്ധേയമായി.

പ്രഭാഷണവും പ്രഖ്യാപനങ്ങളും എന്നതിലുപരി സര്‍‌ഗാത്മകവും ക്രിയാത്മകവുമായ ഇടപെടലുകളിലൂടെ അടയാളപ്പെടുത്തലുകള്‍ എന്നതാണ്‌ ഖ്യു.മാറ്റ്‌ ശൈലി.ഈ രീതി തന്നെയായിരിക്കണം ഈ കൊച്ചു സംഘത്തിന്റെ പ്രത്യേകതയും.ഖത്തര്‍ മഹല്ലു അസോസിയേഷന്‍ തിരുനെല്ലൂര്‍ പ്രതിനിധികള്‍ പറഞ്ഞു.

വിദ്യഭ്യാസ രംഗത്ത്‌ മികച്ച പ്രകടനം കാഴ്‌ചവെച്ച വിദ്യാര്‍‌ഥി വിദ്യാര്‍‌ഥിനികളെ  വിശിഷ്‌ട വ്യക്തിത്വങ്ങളുടെ സാന്നിധ്യത്തില്‍ വേദിയില്‍ ആദരിച്ചു.

തിരുനെല്ലൂര്‍ മഹല്ല്‌ ഖത്വീബ്‌ അബ്‌ദുല്ല അഷ്‌റഫി,മഹല്ലു പ്രസിഡണ്ട്‌ അബു കാട്ടില്‍,ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍ പ്രസിഡാന്റ്‌ ഷറഫു ഹമീദ്,മഹല്ല്‌ പ്രവര്‍‌ത്തക സമിതി അം‌ഗങ്ങള്‍ പ്രവാസി സംഘങ്ങളുടെയും സംഘടനകളുടെയും പ്രതിനിധികള്‍ സാമൂഹിക സാംസ്കാരിക രം‌ഗത്തെ പ്രമുഖരും ജന പ്രതിനിധികളുമായ മുരളി പെരുനെല്ലി എം.എല്‍.എ,അബ്ദുൽ റഹീം ആർ.വി. (മുസ്ലിം ലീഗ് ജില്ലാ വൈസ്‌ പ്രസിഡന്റ്),ജോസ് വളളൂർ (ഡി.സി.സി ജില്ല വൈസ്‌ പ്രസിഡന്റ്),എ.കെ.ഹുസൈൻ (പഞ്ചായത്ത് പ്രസിഡണ്ട്),എസ്.ഐ (പാവറട്ടി പൊലീസ്‌ സ്റ്റേഷന്‍) ,ഫൈസൽ മാസ്റ്റർ (പാടൂർ ഹൈസ്‌കൂള്‍ പ്രിൻസിപ്പൽ),സബാസ്റ്റ്യൻ മാസ്റ്റർ (ഹെഡ്‌മാസ്റ്റര്‍ പാടൂർ),അസ്‌കർ അലി തങ്ങൾ (പാടൂർ മഹല്ല് പ്രസിഡന്റ്) , ഷാജഹാൻ പെരുവല്ലൂർ (പാവറട്ടി മഹല്ല്‌ വൈസ്‌ പ്രസിഡന്റ്) , ജിനി തറയിൽ (പുതൂമനശ്ശേരി മഹല്ല് സെക്രട്ടറി)  ,റഹ്‌മാന്‍ തിരുനെല്ലൂർ,എം.വി. അഹമ്മദ് ഹാജി,പി.എം ഷംസുദ്ധീൻ.എം.ബി സെയ്‌തു മുഹമ്മദ്, കെ.പി. ആലി,ജാഫർ സാദിഖ് തങ്ങൾ പാടൂർ എന്നിവര്‍ വേദിയെ ധന്യമാക്കി.

സം‌ഗമത്തില്‍ സഹകരിച്ചവര്‍‌ക്കും പ്രവര്‍‌ത്തിച്ചവര്‍‌ക്കും പങ്കെടുത്തവര്‍‌ക്കും വിശിഷ്യാ മഹല്ല്‌ നേതൃത്വത്തിനും ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍ ജനറല്‍ സെക്രട്ടറി ഷിഹാബ്‌ ഇബ്രാഹീം നന്ദി പ്രകാശിപ്പിച്ചു.

Sunday, 3 June 2018

ഇഫ്‌ത്വാര്‍ സം‌ഗമം

തിരുനെല്ലൂര്‍:ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍ ഒരുക്കുന്ന ഇഫ്‌ത്വാര്‍ സം‌ഗമവും,റമദാനിലെ സാന്ത്വന വിതരണവും ജൂണ്‍ 14 വ്യാഴാഴ്‌ച സം‌ഘടിപ്പിക്കും.സം‌ഗമത്തില്‍ മഹല്ല്‌ നേതൃത്വവും,തിരുനെല്ലൂരിന്റെ അയല്‍‌പക്ക മഹല്ലുകളിലെ  പ്രതിനിധികളും,സാമൂഹ്യ സാം‌സ്‌കാരിക രാഷ്‌ട്രീയ രം‌ഗത്തെ പ്രമുഖരും ജന പ്രതിനിധികളും ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍ നേതൃത്വവും പങ്കെടുക്കും.സഹൃദയരുടെ പങ്കാളിത്തവും പിന്തുണയും ഉണ്ടാകണമെന്ന്‌ ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍ ജനറല്‍ സെക്രട്ടറി ഷിഹാബ്‌ ഇബ്രാഹീം അഭ്യര്‍‌ഥിച്ചു.

ക്ഷണക്കത്തിന്റെ പൂര്‍‌ണ്ണ രൂപം.

പരിശുദ്ധ മാസത്തിന്റെ വസന്തം ആവോളം ആസ്വദിക്കാനും അതിന്റെ മധുരം മറ്റുള്ളവരിലേയ്‌ക്ക്‌ പകരാനും അനുഗ്രഹീത നാളുകളിലെ പുണ്യം പൂര്‍‌ണ്ണമായും കൊയ്‌തെടുക്കാനും സര്‍‌വ്വ ലോക പരിപാലകനായ നാഥന്‍ അനുഗ്രഹിക്കുമാറാകട്ടെ.

അല്ലാഹുവിന്റെ അനുഗ്രഹ കടാക്ഷത്താല്‍ ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍,അതിന്റെ സാന്ത്വന സന്നദ്ധ പ്രവര്‍‌ത്തനങ്ങളിലെ നൈരന്തര്യം കെടാതെ സൂക്ഷിച്ചു പോരുന്നു. വ്രത വിശുദ്ധിയുടെ നാളുകളില്‍ വിപുലമായ രീതിയില്‍ നന്മയോട്‌ ആഭിമുഖ്യമുള്ള കര്‍‌മ്മങ്ങള്‍ അനുവര്‍‌ത്തിക്കാനുള്ള സൗഭാഗ്യം കൊണ്ടും തിരുനെല്ലൂരിലെ ഈ പ്രവാസി കൂട്ടായ്‌മ അനുഗ്രഹിക്കപ്പെട്ടിരിക്കുന്നു.എല്ലാ വര്‍‌ഷവും റമദാനിലെ സാന്ത്വന പരിപാടികള്‍ നടക്കുന്നതിനോടനുബന്ധിച്ച്‌ ഒരുക്കാറുള്ള  ഇഫ്‌ത്വാര്‍ വിരുന്ന്‌  വ്യാഴാഴ്‌ച ജൂണ്‍ 14 ന്‌ നടക്കും. തിരുനെല്ലൂര്‍ നൂറുല്‍ ഹിദായ മദ്രസ്സാങ്കണത്തില്‍ സം‌ഘടിപ്പിക്കുന്ന ഈ സ്‌നേഹ വിരുന്നിലേയ്‌ക്ക്‌ താങ്കളെ ആദര പൂര്‍‌വ്വം ക്ഷണിക്കുന്നു.

പ്രാര്‍‌ഥനയോടെ ....
ഖത്തര്‍ മഹല്ലു അസോസിയേഷന്‍ തിരുനെല്ലൂര്‍
പ്രസിഡണ്ട്‌
ഷറഫു ഹമീദ്‌
ജനറല്‍ സെക്രട്ടറി
ഷിഹാബ്‌ ഇബ്രാഹീം