ഖത്തര്‍ മഹല്ലു അസോസിയേഷന്‍ തിരുനെല്ലൂര്‍ വ്യവസ്ഥാപിതമായും സജീവമായും സേവന സന്നദ്ധ സാന്ത്വന പ്രവര്‍‌ത്തനങ്ങളാല്‍ മഹല്ലിലെ നിറ സാന്നിധ്യമാണ്‌.
ഖത്തറിലെ സാമൂഹിക സാംസ്കാരിക രാഷ്‌ട്രീയ രം‌ഗത്ത്‌ സജീവ സാന്നിധ്യവുമായിരുന്നു അബു കാട്ടില്‍.തിരക്ക്‌ പിടിച്ച തന്റെ പ്രവാസ ജിവിതത്തില്‍ മഹല്ലിന്റെയും നാട്ടുകാരുടേയും വിഷയം വരുമ്പോള്‍ പ്രഥമ പരിഗണന തന്റെ ഗ്രാമത്തിനും ഗ്രാമവാസികള്‍‌ക്കും എന്ന പ്രതിജ്ഞാബന്ധമായ കാഴ്‌ചപ്പാട്‌ കാത്തു സൂക്ഷിച്ചു പോന്ന ആദരണീയനായ അബു കാട്ടിലിന്‌ സമുചിതമായ യാത്രയയപ്പ്‌ ഏപ്രില്‍ 22 വെള്ളിയാഴ്‌ച ഷഹാനിയ പാര്‍ക്കില്‍ ഒരുക്കുന്നുണ്ട്‌.
ഏപ്രില്‍ 22 വെള്ളിയാഴ്‌ച കാലത്ത്‌ 08.30 ന്‌ സിറ്റി പരിസരത്ത് സെക്രട്ടറി അബ്‌ദുല്‍ നാസര്‍ അബ്‌ദുല്‍ കരീമിന്റെ നേതൃത്വത്തില്‍ ജിസ്റ്റ്റേഷന്‍ ആരം‌ഭിക്കും.കൃത്യം ഒമ്പത്‌ മണിക്ക്‌ സംഗമ വേദിയായ ഷഹാനിയ പാര്‍‌ക്കിലേയ്‌ക്ക്‌ പുറപ്പെടും.കാലത്ത്‌ 10 മുതല്‍ ആദ്യ സെഷന്‍ ആരം‌ഭിക്കും.അസോസിയേഷന്‍ വാര്‍‌ഷിക പ്രവര്‍‌ത്തക രൂപ രേഖ അം‌ഗങ്ങള്‍‌ക്കിടയില്‍ സവിസ്‌തരം വിശദീകരിക്കുകയും ചര്‍‌ച്ചയ്‌ക്ക്‌ വിധേയമാക്കുകയും ചെയ്യും.പ്രസിഡന്റ്‌ ഷറഫു ഹമീദിന്റെ അധ്യക്ഷതയില്‍ ചേരുന്ന സം‌ഗമത്തില്‍ ജനറല്‍ സെക്രട്ടറി ഷിഹാബ്‌ എം.ഐ വിഷയം അവതരിപ്പിക്കും.സെക്രട്ടറി ശൈദാജ്‌ നന്ദി പ്രകാശിപ്പിക്കും.
ജുമ‌അ നമസ്‌കാരാനന്തരം രണ്ടാമത്തെ സെഷന്‍ പ്രാരം‌ഭം കുറിക്കും.പ്രവര്‍‌ത്തക സമിതി അം‌ഗം അബ്‌ദുല്‍ ഖാദര്‍ പുതിയവീട്ടിലിന്റെ ഖുര്‍‌ആന്‍ പഠനത്തോടെ ആരം‌ഭിക്കുന്ന കലാ കായിക സാംസ്കാരിക സം‌ഗമം വൈവിധ്യമാര്‍ന്ന പരിപാടികളാല്‍ സമ്പന്നമാകും.
മണലാരണ്യത്തിലാണെങ്കിലും പ്രകൃതിരമണീയമായ പ്രദേശത്ത്‌ അവിസ്‌മരണീയമായ സാം‌സ്‌കരിക വിരുന്നായിരിക്കും ഈ സം‌ഗമം എന്ന്‌ ഖത്തര്‍ മഹല്ല്‌ അസോസിയേഷന്‍ തിരുനെല്ലൂര്‍ അധ്യക്ഷന്‍ ഷറഫു ഹമീദ്‌ അറിയിച്ചു.
