"ആകാശവാണി തിരുനവനന്തപുരം തൃശുര്‍ ആലപ്പുഴ.പ്രാദേശിക വാര്‍ത്തകള്‍ വായിക്കുന്നത്‌ രാമചന്ദ്രന്‍ ."പ്രധാന വാര്‍ത്തകള്‍ ഒരിക്കല്‍കൂടെ.വാര്‍ത്തകള്‍ കഴിഞ്ഞാല്‍ സംസ്‌കൃതത്തിലുള്ള ഡല്‍ഹി വാര്‍ത്തകള്‍ തുടങ്ങിയാലാണ്‌ ഓരോരുത്തരും തങ്ങളുടെ ഇടങ്ങളിലേയ്‌ക്ക്‌ പിരിയുക.
ഒരുമിച്ച്‌ വാര്‍ത്തകള്‍ കേട്ടും വാര്‍ത്താ വിശേഷങ്ങള്‍ പങ്കുവെച്ചും ഒരുമിച്ചു ചായ കുടിച്ചും വെടിപറഞ്ഞും സന്തോഷങ്ങളും ദുഖങ്ങളും പങ്കു വെച്ചും കഴിഞ്ഞു കൂടിയിരുന്ന ഒരു സുവര്‍ണ്ണ കാലഘട്ടം തിരുനെല്ലുരിനുണ്ടായിരുന്നു.
മഞ്ഞിയില്‍ അന്തുക്കാടെ ടൈലര്‍ ഷോപ്പ്,ബാലേട്ടന്റെയും ഒസാന്‍ അദ്ദുക്കാടെയും ബാര്‍‌ബര്‍ ഷോപ്പ്, റേഷന്‍കട , സൈക്കിള്‍ കട,റേഡിയൊ റിപ്പയര്‍ ഷോപ്പ് കൂടാതെ സ്വര്‍‌ണ്ണം - വെള്ളിയാഭരണങ്ങള്‍ പണിയുന്നവരും അതിന്റെ ഭാഗമായി ചെറിയൊരു ജ്വല്ലറിയും തിരുനെല്ലുരിലുണ്ടായിരുന്നു.
പാടത്തെ പീടികയിലെ പള്ളിയുടെ ഇടതു ഭാഗത്തായിരുന്നു മീന്‍ ചന്ത. ഉണക്കമീന്‍ കച്ചവക്കാരായ സ്‌ത്രീകളും പ്ലാവിലക്കച്ചവടക്കാരും ഈ ചന്തയുടെ ഭാഗമായിട്ടെന്നപോലെ ഉണ്ടാകാറുണ്ട്.
കല്യാണക്കുറികളും സഹായക്കുറികളും അധികവും നടത്തപ്പെട്ടിരുന്നത് പ്രസിദ്ധമായ അലീമാത്താടെ ചായപ്പീടികയില്‍ തന്നെയായിരുന്നു. നാട്ടുകാര്‍ക്ക്‌ എന്തെങ്കിലും ഒരാവശ്യം വന്നാല്‍ പണം സമാഹരിക്കുന്ന സഹൃദ പൂര്‍‌ണ്ണമായ രീതിയായിരുന്നു ചായക്കുറി.
വര്ഗീസ് വൈദ്യരുടെ പീടിക മൂലയില്‍ ഒരു ഇടുങ്ങിയ മുറിയില്‍, എല്ലാവരും ആശ്രയിച്ചിരുന്ന ഒരു കേന്ദ്ര സർക്കാർ സ്ഥാപനം പോസ്റ്റാഫീസ് പാടത്ത് പീടികയിൽ പ്രവർത്തിച്ചിരുന്നു.മധ്യാഹ്നത്തോട് കൂടി ഒരുവിധം എല്ലാവരും മെയില്‍ നോക്കാന്‍ അവിടെ സമ്മേളിക്കുക പതിവായിരുന്നു.
അദ്ദേഹത്തിന്റെ സ്വതസിദ്ധമായ ശൈലിയില്‍ ഫലിതത്തിന്റെ മേമ്പൊടി ചേര്‍ത്തതുമായ പേരുവിളികളിൽ കൂടിനിൽക്കുന്നവർ ചിരിച്ചു ചാകും. അടുത്തടുത്ത വീടുകളിലേക്കുള്ള ഉരുപ്പടികൾ ഓരോരുത്തരേയും ഏൽപ്പിച്ചു കൊച്ചാപ്പു സ്ഥലം വിടും.ഇതോടെ ഒരു മധ്യാഹ്ന സമ്മേളനം കഴിഞ്ഞ പ്രതീതിയില്‍ ആളുകള്‍ പിരിഞ്ഞു പോകും.
========
