അണിചേരാന്‍ പ്രതിജ്ഞാബദ്ധരാകുക ...
--------------------
പ്രവാസത്തോളം പഴക്കമുള്ള സം‌വിധാനമാണ്‌ പ്രവാസി തിരുനെല്ലൂര്‍ കൂട്ടായ്‌മ.പരിമിതമായ ഭൗതിക സാഹചര്യങ്ങളില്‍ നിന്നു കൊണ്ട് പടുത്തുയര്‍‌ത്തിയ പ്രവാസി സം‌ഘത്തിന്റെ ദീര്‍‌ഘകാല പ്രവര്‍‌ത്തനങ്ങളും ഘട്ടം ഘട്ടമായുണ്ടായ കുതിപ്പും കിതപ്പും വളര്‍‌ച്ചയും വികസനവും പ്രത്യക്ഷത്തിലുള്ള ഒരു തിരിഞ്ഞു നോട്ടത്തില്‍ ദര്‍‌ശിക്കാനായില്ലെങ്കിലും അവഗണിക്കാനാകാത്ത അടയാളപ്പെടുത്തലുകളാല്‍ ധന്യമാണ്‌.
നിസ്വാര്‍‌ഥരായ കാരണവന്മാര്‍ ദിശകാട്ടിയ വഴികളിലൂടെ കാലത്തിന്റെ തേട്ടത്തിനനുസരിച്ച രൂപഭാവങ്ങളിലൂടെ പരമാവധി സഞ്ചരിക്കാന്‍ പിന്‍തലമുറക്കാര്‍‌ക്ക് കഴിയും വിധം അക്ഷരാര്‍‌ഥത്തില്‍ ഒരു അസോസിയേഷനായി ഖത്തര്‍ മഹല്ല് അസോസിയേഷന്‍ തിരുനെല്ലൂരിന്‌ മാറാന്‍ കഴിഞ്ഞു എന്നത് ചാരിതാര്‍‌ഥ്യ ദായകമത്രെ.
വിശാല തിരുനെല്ലൂര്‍ മഹല്ല് പരിധിയില്‍ നിന്നുള്ള നല്ലൊരു ശതമാനം പ്രവാസികള്‍ ഗള്‍‌ഫ് രാജ്യങ്ങളിലുണ്ട്.അതില്‍ സിം‌ഹ ഭാഗം ഖത്തറിലാണെന്നതും സുവിദിതമാണ്‌.പ്രസ്‌തുത പ്രവാസി സഹോദരങ്ങളിലെ യുവ നിരയിലുള്ളവരില്‍ അധികവും ഈ മനോഹരമായ കൊച്ചു രാജ്യത്ത് തന്നെയായിരിക്കണം.ഈ യുവ ശക്തിയെ സര്‍‌ഗാതമകമായും ക്രിയാതമകമായും ഒരുമിച്ചു നിര്‍‌ത്താനുള്ള അസോസിയേഷന്റെ വിവിധ തരത്തിലും തലത്തിലുമുള്ള എളിയ ശ്രമങ്ങളും ശ്ലാഘനീയമാണ്‌.ഈ സം‌വിധാനത്തില്‍ അണിചേരുക എന്നത് നമ്മുടെ ബാധ്യതയായി മനസ്സിലാക്കാന്‍ ഓരോ അം‌ഗവും പ്രതിജ്ഞാബദ്ധനാകണം എന്ന്‌ ആശിക്കുന്നു.
കുന്നോളം അലക്ഷ്യമായി പ്രവര്‍ത്തിക്കുന്നതിനേക്കാള്‍ കുന്നിക്കുരുവോളം ലക്ഷ്യബോധത്തോടെ അനുഷ്ഠിക്കുന്നതിലാണ് ഐശ്വര്യവും അനുഗ്രഹവും. ഇതാണ് സമ്പന്നമായ സംസ്‌കാരം ആരോഗ്യകരമായ പ്രവര്‍ത്തനവും. ഇതുതന്നെയാണ് വിശ്വാസിക്ക് നല്‍‌കപ്പെടുന്ന പാഠവും.
എല്ലാ അര്‍‌ഥത്തിലും നാടിനും നാട്ടുകാര്‍‌ക്കും ആശയും ആശ്രയവുമായി പ്രവര്‍‌ത്തന സജ്ജമായി സാന്ത്വന സേവന സംരം‌ഭങ്ങളുമായി നൂതനായ വഴികളിലൂടെ നേരിന്റെ നന്മയുടെ സുഗന്ധ വാഹിനികളായി പ്രസരിക്കാനും പ്രചരിക്കാനും നാഥന്‍ അനുഗ്രഹിക്കുമാറാകട്ടെ.
---------------
ഖത്തര്‍ മഹല്ല് അസോസിയേഷന്‍ തിരുനെല്ലൂര്‍
മീഡിയ വിഭാഗം
