--------------------
ഖത്തര്‍ മഹല്ലു അസോസിയേഷന്‍ തിരുനെല്ലൂര്‍ 2025 -26 കാലയളവിലേക്കുള്ള നേതൃത്വം തെരഞ്ഞെടുക്കപ്പെട്ടു.ഷറഫു ഹമീദ് പ്രസിഡണ്ട് പദവിയിലേക്ക് തുടര്‍‌ച്ചയായി വീണ്ടും തെരഞ്ഞെടുക്കപ്പെട്ടു .ജനറല്‍ സെക്രട്ടറി സ്ഥാനത്തേക്ക് കെ.ജി റഷീദിനെ തന്നെയാണ്‌ ജനറല്‍ ബോഡി അം‌ഗീകരിച്ചത്.
വലിയ ഉത്തരവാദിത്തങ്ങള്‍ ഏറ്റെടുക്കാന്‍ നിയോഗിക്കപ്പെട്ട സം‌ഘമാണ്‌ വിശ്വാസികള്‍.അതിന്റെ ഗൗരവം ചോര്‍‌ന്നു പോകരുത്.ഖത്തര്‍ മഹല്ല് അസോസിയേഷന്‍ തിരുനെല്ലൂര്‍ ജനറല്‍ ബോഡി ഉദ്‌ഘാടനം ചെയ്‌തു കൊണ്ട് അസീസ് മഞ്ഞിയില്‍ പറഞ്ഞു.
ഉത്തമ സമൂഹം എന്ന് വിശേഷിപ്പിക്കപ്പെട്ടവരൂടെ നിതാന്ത ജാഗ്രതയെ ഓര്‍‌മ്മപ്പെടുത്തിയുള്ളതായിരുന്നു അബ്‌ദുല്‍ ഖാദര്‍ പുതിയ വീട്ടിലിന്റെ ഖുര്‍‌ആന്‍ ദര്‍‌സ്.
സമൂഹത്തോടുള്ള കടമയും കടപ്പാടും സാന്ത്വന സേവന സന്നദ്ധതയുടെ അനിവാര്യതയും അധ്യക്ഷന്‍ ഷറഫു ഹമീദ് അടിവരയിട്ടു.
കാലിക്കറ്റ് നോട്ട് ബുക്കില്‍ ജനുവരി 31 ന്‌ ചേര്‍‌ന്ന ജനറല്‍ ബോഡി അം‌ഗങ്ങളുടെ നിറസാന്നിധ്യം കൊണ്ട് സമ്പന്നമായിരുന്നു.
ജനറല്‍ സെക്രട്ടറി കെ.ജി റഷീദ്,ഫിനാന്‍‌സ് സിക്രട്ടറി ഹാരിസ് അബ്ബാസ്,സാന്ത്വനം സെക്രട്ടറി അനസ് ഉമര്‍ എന്നിവര്‍ അതത് വകുപ്പുകളുടെ റിപ്പോര്‍‌ട്ടുകള്‍ യഥാക്രമം അവതരിപ്പിച്ചു.റിപ്പോര്‍‌ട്ടുകള്‍ പാസ്സാക്കപ്പെട്ടതിനു ശേഷം പ്രവര്‍‌ത്തക സമിതി പിരിച്ചു വിട്ടതായി അധ്യക്ഷന്‍ അറിയിച്ചു.
മഹല്ല് നേതൃത്വം ശക്തിപ്പെടേണ്ടത് കാലഘട്ടത്തിന്റെ തേട്ടമാണ്‌.വര്‍‌ത്തമാന സാമൂഹ്യ രാഷ്‌ട്രീയ സാം‌സ്‌കാരിക പരിസരത്തെ ദൗര്‍‌ഭാഗ്യകരമായ പ്രവണതകള്‍ നിര്‍‌മാര്‍‌ജ്ജനം ചെയ്യാനാകും വിധം പുതിയ ചുവടുവെപ്പുകള്‍ അതീവ ഗൗരവത്തോടെ പരിഗണിക്കേണ്ടതുണ്ട്.വിവിധ സം‌ഘടനകള്‍ സംഘങ്ങള്‍ സം‌വിധാനങ്ങള്‍ സാം‌സ്‌ക്കാരിക രാഷ്‌ട്രീയ വിഭാഗങ്ങള്‍ എന്നിവക്ക് അതീതമായി കൃത്യവും വ്യക്തവുമായ മാര്‍‌ഗരേഖയുമായി ലക്ഷ്യ ബോധത്തോടെ പ്രവര്‍‌ത്തന സജ്ജമായി മഹല്ല് സം‌വിധാനം മാറേണ്ടതുണ്ടെന്ന അഭിപ്രായം പങ്കുവെച്ചു കൊണ്ടായിരുന്നു അധ്യക്ഷന്‍ ഷറഫു ഹമീദ് ഉപസം‌ഹരിച്ചത്.
ഫൈസല്‍ കരീമിന്റെ നന്ദി പ്രകാശനത്തോടെ ആദ്യ സെഷന്‍ അവസാനിച്ചു.
രണ്ടാമത്തെ സെഷന്‍ തെരഞ്ഞെടുപ്പിന്‌ ഉത്തരവാദപ്പെടുത്തപ്പെട്ട ടീമിന്റെ നേതൃത്വത്തില്‍ നടന്നു.പ്രവര്‍‌ത്തന സജ്ജരായ വ്യക്തിത്വങ്ങളെ തെരഞ്ഞെടുക്കുന്നതിന്റെ പ്രാധാന്യം ആരിഫ് ഖാസ്സിം ഓര്‍‌മ്മിപ്പിച്ചു. തെരഞ്ഞെടുപ്പ് ചട്ടങ്ങള്‍ വായിച്ച് വിശദീകരിച്ച ശേഷം വോട്ടിങ്ങിലേക്ക് പ്രവേശിച്ചു.ആരിഫ് ഖാസ്സിമിനൊപ്പം റ‌ഈസ് സഗീര്‍,ഹം‌ദാന്‍ ഹം‌സ എന്നിവര്‍ തെരഞ്ഞെടുപ്പ് പ്രക്രിയ നിയന്ത്രിച്ചു.രഹസ്യ ബാലറ്റ് വഴിയുള്ള തെരഞ്ഞെടുപ്പിന്‌ ശേഷം നിശ്ചിത എണ്ണം അം‌ഗങ്ങളെ പ്രവര്‍‌ത്തക സമിതിയിലേക്ക് ജനറല്‍ ബോഡിയില്‍ നിന്നും തെരഞ്ഞെടുത്തു.
നാട്ടിലെ സാമൂഹ്യ സേവന സാന്ത്വന രം‌ഗത്തെ നിറ സാന്നിധ്യങ്ങളായ ആദരണീയരായ വ്യക്തിത്വങ്ങളെ അവരുടെ സമ്മതം ആരാഞ്ഞശേഷം സമിതിയില്‍ സ്ഥിരം ക്ഷണിതാക്കളാക്കാനുള്ള അധ്യക്ഷന്റെ അഭിപ്രായത്തെ സദസ്സ് അം‌ഗീകരിച്ചു.ഇനിയും അം‌ഗങ്ങള്‍ സമിതിയില്‍ ചേര്‍‌ക്കപ്പെടാനുള്ള സാഹചര്യത്തെയും ജനറല്‍ ബോഡി അം‌ഗീകരിച്ചു.
പ്രഥമ പ്രവര്‍‌ത്തക സമിതിയില്‍ വെച്ച് ഉപാധ്യക്ഷനെയും വിവിധ വകുപ്പുകള്‍‌ക്ക് അനുയോജ്യരായവരെയും നിയോഗിക്കുമെന്ന് തെരഞ്ഞെടുപ്പ് ടീം സദസ്സിനെ അറിയിച്ചു.
ഉച്ച ഭക്ഷണത്തിനു ശേഷം ആരംഭിച്ച സം‌ഗമം വൈകീട്ട് 4 മണിക്ക് സമാപിച്ചു.
============
31.01.2025
