ദോഹ മെട്രോയുടെ ഗോൾഡ് ക്ലബ് ട്രാവൽ പാസിന് ആവശ്യക്കാർ ഏറുന്നു. തിരക്കുള്ള സമയങ്ങളിൽ യാത്രക്കാരുടെ തിരക്ക് വർധിക്കുന്ന സന്ദർഭങ്ങളിലാണ് പ്രത്യേകിച്ചും ഈ പാസിന് ആവശ്യക്കാർ കൂടുന്നതെന്ന് ഇം‌ഗ്ലീഷ്‌ പത്രം റിപ്പോർട്ട് ചെയ്തു.
സ്റ്റാൻഡേർഡ് കാർഡ് നിലവിൽ ഉള്ള യാത്രക്കാർ പോലും ഗോൾഡ് ക്ലബ് ട്രാവൽ പാസ് എടുക്കുന്നുണ്ട്. ആദ്യഘട്ട ഓട്ടം തുടങ്ങിയ റെഡ്ലൈനുകളിൽ 13 സ്റ്റേഷനുകളിലൂടെയാണ് ദോഹ മെട്രാ കടന്നുപോകുന്നത്. അൽ ഖസർ, ഡി.ഇ.സി.സി, ക്യു.ഐ.സി വെസ്റ്റ് ബേ, കോർണിഷ്, അൽബിദ (ഇൻറർചേഞ്ച് സ്റ്റേഷൻ), മുശൈരിബ് (ഇൻറർചേഞ്ച് സ്റ്റേഷൻ), അൽ ദോഹ അൽ ജദീദ, ഉമ്മു ഗ്വാളിന, അൽ മതാർ അൽ ഖദീം, ഉഖ്ബ ഇബ്ൻ നഫീ, ഫ്രീ സോൺ, റാസ്ബു ഫന്റാസ്‌, അൽ വഖ്റ എന്നിവയാണ് ഈ സ്റ്റേഷനുകൾ.ലുസൈൽ, ഖത്തർ യൂനിവേഴ്സിറ്റി, ലെഗ്തൈഫിയ, കതാറ എന്നീ സ്റ്റേഷനുകളും ഉടൻ തുറക്കും.
മെട്രോ സ്റ്റാൻഡേർഡ് കാർഡ്, ഗോൾഡ് ക്ലബ്, ലിമിറ്റഡ് യൂസ് എന്നീ മൂന്നുതരം യാത്രാ കാർഡുകൾ ആണ് ഖത്തർ റെയിൽ പുറത്തിറക്കിയിരിക്കുന്നത്.സ്‌റ്റാന്റേര്‍‌ഡ്‌ കാര്‍‌ഡ്‌ ഒരു യാത്രക്ക് രണ്ട് രിയാലും ഒരു ദിവസത്തെ മൊത്തം യാത്രക്ക് 6 രിയാലും ആണ് നിരക്ക്‌. മെട്രോ സ്റ്റേഷനുകളിലെ ഗോൾഡ് ക്ലബ് ഓഫിസുകളിൽ ഗോൾഡ് ക്ലബ് പാസുകൾ ലഭ്യമാണ്. ഒരു യാത്രക്ക് പത്ത് രിയാൽ ആണ് ചെലവ്. ഒരു ദിവസത്തെ മൊത്തം യാത്രക്കാകട്ടെ 30 രിയാൽ ആണ് ആവുക. സ്റ്റാൻഡേർഡ് പാസുകാർക്കുള്ളതിനേക്കാൾ മെച്ചപ്പെട്ട സീറ്റുകളും സൗകര്യങ്ങളുമാണ് ഗോൾഡ് ക്ലബ് പാസുകാർക്ക് മെട്രോയിൽ ഉള്ളത്. 100 രിയാൽ ആണ് ഗോൾഡ്ക്ലബ് പാസ് സ്വന്തമാക്കാൻ വേണ്ടത്. വാങ്ങുന്ന അന്നുമുതൽ അഞ്ച് വർഷമാണ് ഇതിന്റെ കാലാവധി. ഓരോ യാത്രയിലും ചെലവാകുന്ന തുക കാർഡിൽ രേഖപ്പെടുത്തപ്പെടും. അഞ്ചുവയസിന് താഴെ പ്രായമുള്ള കുട്ടികൾക്ക് യാത്ര സൗജന്യമാണ്. അഞ്ചിനും അതിനും മുകളിലും പ്രായമുള്ളവർക്ക് സ്വന്തം ട്രാവൽ കാർഡ് നിർബന്ധമാണ്.
സ്ഥിരമായി മെട്രോ യാത്ര ചെയ്യുന്നവർക്ക് ഏറെ ഉപകാരപ്രദമാണ് ഗോൾഡ്ക്ലബ് പാസ് എന്ന് യാത്രക്കാർ സാക്ഷ്യപ്പെടുത്തുന്നു.മേയ് എട്ടിനാണ് ദോഹ മെട്രോയുടെ ആദ്യഘട്ട യാത്ര തുടങ്ങിയത്. അന്ന് മുതൽ ഗോൾഡ്ക്ലബ് പാസ് വാങ്ങാനെത്തുന്നവർ കൂടിവരികയാണെന്ന് മെട്രോ ജീവനക്കാരും പറയുന്നു.
കുടുംബങ്ങൾ, ഗ്രൂപ്പായി യാത്ര ചെയ്യുന്നവർ തുടങ്ങിയവർ ആണ് ഇക്കൂട്ടത്തിൽ കൂടുതലും ഉള്ളത്. ഏറെ പഠനങ്ങൾക്കും വിലയിരുത്തലുകൾക്കും ശേഷമാണ് ഖത്തർ റെയിൽ ടിക്കറ്റ് നിരക്കുകൾ തീരുമാനിച്ചിട്ടുള്ളത്. ഏത് തരം ആളുകൾക്കും പ്രാപ്യമായ രൂപത്തിൽ ഉള്ള കാർഡുകൾ ആണ് അവതരിപ്പിച്ചിട്ടുള്ളത്. നിരവധി കൗണ്ടറുകളിൽ യാത്രാകാർഡുകൾ ലഭ്യമാണ്. എന്നാൽ സാധാരണ കാർഡുകളേക്കാൾ ഗോൾഡ്ക്ലബ് കാർഡുകൾക്ക് പണം കൂടുതൽ വേണം. ഇതിനാൽ ഹമദ് വിമാനത്താവളത്തിലേക്ക് കൂടി ദോഹ മെട്രോ നീട്ടുന്ന ഘട്ടത്തിൽ കാർഡ് കൂടുതൽ ഉപകാരമാകുമെന്നാണ് വിലയിരുത്തൽ. മെട്രോയുടെ റെഡ്ലൈൻ അടുത്തുതന്നെ ഹമദ് വിമനത്താവളവുമായി ബന്ധിപ്പിക്കുന്നുണ്ട്.
ഒരു യാത്രക്കാരന് രണ്ട് വലിയ ലെഗേജുകൾ.രണ്ട് ലെഗേജുകൾ മാത്രമേ ഒരു യാത്രക്കാരന് മെട്രോ ട്രെയിനിൽ അനുവദിക്കൂ. ചെറിയ ബാഗുകൾക്ക് പുറമേയാണിത്.ഓരോ ലഗേജും 85സെ.മീ x 60സെ.മീ x 30 സെ.മീ വലുപ്പത്തിൽ കൂടരുത്. പുഷ്ചെയറുകൾ, വീൽചെയറുകൾ തുടങ്ങിയ വലിയ സാധനങ്ങളുമായി യാത്ര ചെയ്യുന്നവർ നിർബന്ധമായും എലിവേറ്ററുകളോ ലിഫ്റ്റുകളോ ഉപയോഗിക്കണം. നിർദേശങ്ങളിൽ പറഞ്ഞതിനപ്പുറം വലുപ്പമുള്ളതോ സുരക്ഷിതമല്ലെന്ന് തോന്നുന്നതോ ആയ ബാഗേജുകൾ ആണ് യാത്രക്കാരന്റെ കൈവശം ഉള്ളതെന്ന് തോന്നിയാൽ അത്തരക്കാർക്ക് മെട്രോ യാത്ര നിരസിക്കപ്പെടാൻ
സാധ്യതയുണ്ടെന്നും ഖത്തർ റെയിൽ തങ്ങളുടെ വെബ്സൈറ്റിൽ മുന്നറിയിപ്പ് നൽകുന്നുണ്ട്.
സാധ്യതയുണ്ടെന്നും ഖത്തർ റെയിൽ തങ്ങളുടെ വെബ്സൈറ്റിൽ മുന്നറിയിപ്പ് നൽകുന്നുണ്ട്.
അവലം‌ബം മാധ്യമം.
